طبعا الحمله هذي صارت مشهور عند الكل
وهيا "ترشيد" عفوا اقصد "تشريـــد"
الحمله الوطنية لـتشريد المواطن الكويتي خارج البلاد !!!
----------------
الصراحه شي يبط الجبد !!
كل يوم والثاني تلاقي اوراق عن الحمله
وشوي تلاقي مسج ياك منهم !!
وشوي تلاقي اعلانات بالتلفزيون !!
وشوي تلاقيهم طابين عندك البيت بعز الظهر تطلع لهم
خير في شي يقولون لك حبينا انذكرك بحملة ترشيد !!
ولا انت قاعد مع الاهل بالبيت وشوي يرن تلفون بيتكم
نعم منو معاي ؟ معاكم حملة ترشيد نحب نذكركم بالحمله!!
------------------
بدال ما تقطون هالملايين على الاعلانات
لصالح شركات (--------)
قاعدين يشفطون من هالفلوس على بو ان حملة توعويه !!
وتفيدون فيها ربعكم على حسابنا !!
قطو هالملايين على مولد كهرباء
وبردو على "عيالكم" علشان الله يبرد عليكم بالاخره !!
------------------
الصراحه شي يفشل !!
الدول الفقيره اقتصاديا وماديا ما سووها
ويوم احتاجوا لمولد كهرباء اول ناس حطتلهم المولد الكهرباء احنا !!
انا ابي افهم شي واحد ليش هالتصرف الغريب !!
انا مو ضد انكم اتساعدون الغير !!
بالعكس الكويت طول عمرها اهيا السباقه
بكل شي واهلها معروفين بالخير
والحمدالله واحنا تربينا على جذي ..
بس المشكله ان الديره تحتاج حق هالسوالف يعني
ديرتكم اولى من الغريب بس عمك اصمخ !!
صار خير ديرتنا حق الغريب !!
واحنا قاعدين بهالقيض " نكش ذبان" على بو ان ترشيد
--------------
وبخصوص هالحمله المزيفه
الي اربحوا منها ملايين
وربحت ناس ملايين
والي فلس منها الشعب المسكين !!
قامت الكهربا تنطفى بروحها بدون سابق انذار !!
من كثر ما اسمعت تهديدات هالحمله !!
---------
للاسف المستشفيات قامت تنقطع عليها الكهربا بسبب خلل ما !!
والمدينه الترفيهيه هم حاشها الانقطاع الي بو خلل ما !!
وآخر هالانقطاعات مستشفي الولادة !!
ناس بعز العمليه تنقطع الكهربا عليهم !!
الي ولادة قيصريه ولا طبيعيه !!
زادوو همهم هم ثاني بسبب هالانقطاع !!
وبعدين ليه متى هالتسيب والمصخره الي عايشين فيها ..
ذبحتــــــــــــــونــــــــــا
-------------------
انا اقترح تسنعون الديره وتشوفون الي ناقصها وبعدين تفرقوا حق العالم !!
عسى ما صار زلزال بديره دزوا لهم مليون
عسى ما صار حرب وخراب بديره دزوا لهم مليون
عسى ما قصر الديره جم بيزه علشان يصلحون ملعب ولا مستشفي دزو لهم مليون
ولو قعدنا انطالب احنا يا الشعب انكم تسنعون الديره وتقطون هالملايين عليها
تقولون : مافي ميزانيه وحتياط الاجيال ومن هالاعذار الي ماتوكل خبز !!
اشوف للغير الفلوس تسرح وتمرح ولنا احنا ماكو ميزانيه !!
--------------
الكلام هذا كل مواطن قاعده يقوله ويموتون من القهر
لمى يشوفون ديرتهم محتاجه وخيرها لغيرها !!
ويليت استفدنا من ورى هالمساعدات الي قاعد نسويها !!
فوق كل هذا ما يبين بعينهم وطول عمرهم يذونه واحنا مثل البهايم نعطيهم !!
بــذمتــكم مو شــي يحــــر !! مو من حقنا نتحلطم ونعصب على الي قاعد يصير بالديره !!
------------------------------
الصـــــــــراحه " ما ننلام"
---------------------
من حبنــــــــــا لهـــــا ... تكلمنا بكل صدق وامانه
من حبنــــــــا لهــــــا ... نبي مصلحة هالديــره
------------------------
نتمني نشوف حملات تهتم بالديره وشعبها
وبسكم لعب بالديره !!
-------------------------------------
من حبنـــــــا لهـــــا ... بنـــوفــر لهـــــا
( كل الي تحتاجه هالديره علشان شعبها الطيب)
--------------------------------
